جمعرات, اکتوبر 17, 2013

Awaraan, Baluchistan: Relief efforts for the earthquake victims (Work report - 1)

Awaraan, Balochistan, Pakistan:

Most effected area by the Earthquake September, 2013.

Muhtram Doston,
Assalam O Alikum.

Awaraan main first day:

Guzishta raat jab hum awaraan puhanche tu hum ko yahan ke Halaat ka koi behtar andaza nahi ho saka tha, magar ab jab subha hoi tu hum ko zalzale (earthquake) se hone wali tabahi aur nuqsan ka buhat behtr andaza ho raha tha, lag bhag sara city he tehes nese (barbaad) ho chuka he, loog edher udher bhage dore phir rahe hain, kisi ko apne piyaron ki parwa hay aur koi apne aur apne ghar walon kay liye jo zalzale se bach gaiye hain ke liye nai panah gaah talash kar raha hay. Balochistani culture bhi ajeb hay, yahan kay log dosre elaqon se aane wale logon ko ajnabi samjh rahe hain, maddad chahte bhi hain magar maddad karne walo par shak bhi kar rahe hain. Gawadar se Awaraan, Balochistan ke raste main hum ko buhat mushkilat ka samna karna para hum ko bar bar yehi kaha jata raha hay kay Awaran jana buhat bara khatrahay, Awaraan main security kay buhat issueshain. kuch shidat pasanad, dhehshat gar hum ko nuqsan bhi puhancha sakte hain. Lekin hum ALLAH ko he apna hafiz mante hain aur ALLAH hehumari hifazat karne wala hay, Humare yahan (Awaraan) anne ka maqsad sirf aur sirf apne baloch bhai behnon aur bachon ki kuch maddad karna hay issi wajha say hamara Iman aur mazboot aur pukhta hay. mere sath meri relief team main shamil tmmam dost o ahbab bhi mazboot iradon kay malik hain, hum sab nai kisi bhi qisam ki dhamki ya pareshani ka shikar na hone ka fesla kia aur sirf apne relief kay kamon par he tawaja day rahe hain. Haan hum ko bar bar pata nahi kiun yeah ahsas zaroor hota jaa raha hay kay jese hum Pakistan main nahi balke kisi aur mulk main agai hain woh bhi shayad ghair khanooni tareqe say. Jabke hamari maloomat kay mutabiq Awaraan, Balochistan ka aik earthquake effected area hay aur Islamic Republic of Pakistan ka hisa hay. Hum bhi Pakistani hain aur pareshan haal logon ke maddad kay kaam say yahan tak aye hain, hum ne apne gharon ko chora hay, apne aram ko apni nokri ko aur apne ghar walon ko umid dilai hay kay hum aik naik maqsad kay liye jaa rahe hain. Tu phir darna kesa? wese bhi hum ko yahan konsa umar bhar bethna hay, jo bhi imdadi saman (relief goods) hum ne Karachi main jama kari thi wu sab yahan (Awaraan) kay earthquake victims ko bahtar say bahtar tariqe say de kar wapas apne gharon ko rawana ho jana hay.

Relief work's in Awaraan, Balochistan:
Buhat he ziada afsoos aur nadamat hoi yeah dekh kar kay sirf muqami loog aur Pakistani forces kay kuch loog he earthquake victims ki maddad kay liye yahan mojood hain. aaj ka sara din hum ne sirf servey karne main guzara, Iss servey main hum ne pori koshish kari kay buhat he ziada mutasir (earthquake victims) ko he hamara imdadi saman mil sake. Awaraan city main tu loog aik dosre ki maddad kar he rahe hain magar yahan sab say bara masla peene kay saaf pani (drinking water) ka hay yahan kahi bhi peene ka saaf pani abhi tak mojood nahi hay. Hum apne sath jitna pani (mineral water for drinking) laye hain wu tu yahan ke logon main se sirf kuch ke he piyas bujha sakta hay.

Jub hamari amad ki itila logon tak puhanchi tu hamare say milne buhat sare loog agaye aur apne apne masail batane lage aur apni zaroort say agah karne lage, Aksar logon ne hum say shikayat bhare lehje main kaha ke kia hum insan nahi hain? kia hum Pakistani nahi hain jo humari maddad nahi ke jaa rahi? humare pass in logon ke kisi bhi sawal ka koi jawab nahi hay. Hum sirf itna jante hain kay jo kuch hum kar sakte hain, humari hesiyat aur himat hay woh hum kar rahe hain. Pakistan aur Dunya main rehne wale Baqi Insan khaas kar musalmanon (muslims) kia kar rahe hain yeah har insan ka apna apna faith aur Iman hay. Hum sirf yehi dua kar sakte hain kay ALLAH tmam insanon ko aik dosre ki maddad karne ki toufeq aur hidayat de - Ameen. (Magar shayad main ne kahi parha hay ya kisi say sunna hay kay Hidayat bhi unhi ko milti hay jo hidayat ka talabgaar hota hay).

Hum ko buhat sare kaam karne hain. Pani ki taqseem sab say mushkil aur time taking work hay. Hum ne aik dafa phir Awaraan ka muqami hospital kay kuch doctors say baat kari jinhon nay hum ko bataya kay Awaraan main koi darya, koi jheel (lake) ya pani stock karne ka proper intizam nahi hay jaha say pani hasil kia ja sake, sirf barish kay pani ko he jama kar kay loog apni zindagi guzarte hain. Yeah bhi buhat mushkil baat hay. Hospital main he hum ko kuch muqami logon ne bataya kay Awaraan se ziada nuqsan Awaarn ke janobi elaqo aur maghribi elaqo main howa hay jahan pore kay pore gaon, dehat (villages) khtam ho gaye hain, Jani nuqsan ka tu koi andaza nahi hay magar maali nuqsan buhat ziada hay, logon kay paas ghizai ajnaas, pani waghera ka jo bhi stock hay wou sab he khatam ho chuka hay. Iss par aksar loog apne elaqon se Awaran city ki taraf aane kay liye tayar nahi hain, iss main kuch yahan ka culture aur kuch logon ko bache kuche maal ke lut jane ka khtra hay, iss kay elawa yahan koi siyasi ya hakomti nizam mojood nahi hay, jis kay zariye logon ki koi maddad ya daad rasi ho sake. Awaraan, Balochistan kay un elaqon main hay jahan Qabaili nizam (Trible system) chalta hay, Elaqe ka koi bara jagerdar, ya wadera he yahan ke logon ki qismat ka fesla karta hay, wohi wadera yahan ka hakim hay, wohi wadera yahan ka nizam e hakoomat hay, wohi wadera yahan mushkil main ghire pareshan haal logon ke liye ummid hay, jesa wu chahe gaa wesa he hoga. Yahan ye bhi likh don kay, hum ko bhi yahan kay aik buhat bare wadere sahab (naam nahi likh sakta, kiu kay hum ko yahan abhi shayad kuch din aur kaam relief work karna pare) ne apne karindon kay zariye rabita kia aur hum ko kaha gaya kay hum jo bhi imdadi saman laye hain wu un tak puhancha dain aur jo bhi maddad (relief work) karna chahte hain un kay zariye he karen. jis par hum sab voluteer sathiun ne mil bethne ka fesla kia aur in halat par tafsili baat karne ka kaha k abi kia karna hay?

Sham tak hum apne servey aur muqami logon se mulaqat kar kay farigh ho chuke thy, Awaraan, may he hum ko kuch loog mile jinhon ne hum ko yeah bataya kay Awaraan kay degar elaqon main halaat buhat kharab hain, loog bhook aur piyas ka shikar hain, Muqami loog apne khandan walon ko kisi sorat wahan kay logon ko apne elaqon se bahar nikalne kay liye tayar nahi hain. (Iss main buhat bara kirdar muaqmi waderon ka hay) yahan ke wadere yahan kay badshah hain jo sirf apni marzi chalate hain aur kisi sorat nahi chahte kay inn elaqon kay loog yahan say kahi bahar niklen bahar ki dunya ko dekhne kuch shaoor hasil karen aur kahi esa na hoo kay phir in waderon ki hakomat ko khatra ho jaye, wese bhi jab aik insan kay hath main kisi bhi qisam ka hahtyar ho tou sharef insan khud ko majboor aur bebas mehsoos karta hay.

Hum sabhi doston ne yehi fesla kia kay kisi bhi sorat ghar khanooni dabao ka shikar nahi hona hay, aur kisi bhi qisam ki dehshat ka muqabla apne Imaan aur apne mustahkam iradon say karna hay aur agar humara yahan falahi kaam karna mushkil howa ya hum ko roka gaya tu hum foran yahan se wapas chale jaiye ge.

Raat tak hum apni calculations se farigh ho chuke thy, ham apne liye kisi bhi qisam ka khana pene ka saman nahi laye thy socha tha kay jo kuch hum Awaraan kay logon ko dain ge ussi main se hum bhi khaen gay wese bhi hum yahan kisi bhi qisam ki outing ya picnin kay liye nahi aye thy aur hamara zamer bhi yeah kisi sorat gawara nahi kar sakta tha kay hum yahan ke logon ko tu bhoka dekhen aur khud apne liye kisi qisam kay khaas khane ka intizam karen.

Muqami hospital kay doctors aur kuch logon kay sath mil kar hum sab nay apne liye khane ka intizam kia. aur jo bhi hasil howa ALLAH ka shukr ada kar kay khaya. subha kay liye intizam kia kay hum ko kis tarha say apna relief ka kaam shuro karna hay, Hum Karachi say yahan sirf 3 din kay liye aye thy aur yehi plan kia tha kay hum sab se pehle koshish karen gay kay apne sath laye gaye pani ki frahmi shuro kar den. magar abhi tak kuch samjh nahi araha tha kay kaha say apna kaam shuro karen. kiun kay yahan tu har insan ko maddad ki zarooarat thi. Muqami logon kay mashore aur halat ko dekhte howe hum ne fesla kia kay humare tmam dost (volunteers) subh 2 teams banain ge.
Pehli team ka kaam hoga apne sath laye gaye saman ko tarteb dena aur hisab kitab rakhna aur dosri team field work main nikle ge. hum apne oper jitna bhi imdadi saman laad sakte hain ladne ki koshish karen ge aur agar kuch muqami logon ne sath diya tu jitna door tak jaa sakte hain jaiye ge aur Imdadi saman ki taqseem shuro karen ge, Apne sath lai gai medicines kay liye hum ne yeah fesla kia tha kay iss medicines ko le kar hum muqami hospital kay doctors kay sath mill kar aik free medical camp lagain ge aur agr kuch medicines bach jati hain tu wu muqami hospital ki management kay hawale kar di jaen ge.

Main khud guzishta kuch barson se Flahai aur Imdadi kamon ka hissa raha hon, Flood kay baad, Earthquacke 2005 kay baad say le kar aaj tak jo kuch bhi sekha tha aaj un sab imtihanat ko samne rakhna tha, jo kuch sekha tha uss sab ki azmaish ka waqt tha. Main ne bari mushkil se yeah imdadi team banai thi aur Imdadi saman ko yahan tak puhanchaya tha. Main jb bhi himat harta yaa khud ko thaka howa mehsoos karta tu Mere aziz dost jo aaj tak kisi na kisi tarha falahi kamon ko sar anjaam de rahe hain un ki kuch baton ko yaad karta.
"Mushkil taren waqt aur halaat main yeah na dekho kay kon kia kar raha hay? balke yeah dekho kay tum kia karsakte hoo aur kia kar rahe hoo, apne iradon ko pukhta rakho, ALLAH par bharosa rakho aur apne maqsad kay hasool kay liye lag jao, Pher dekhna ALLAH tumhari maddad kese karta hay."
Aur yeah bhi ek haqeqat hay kay ALLAH ne kisi na kisi tarha hum ko mushkil wqat aur halat se nikala hay. sirf Irada aur yaqen pakka aur mustahkam hona he chahiye. Main jiss had tak apne sathiun aur doston ko umid dila sakta tha dilae aur subh ka intizar karne lage. Kisi bhi falahi ya imdadi kaam ke doran yeah shayad pehla moqa tha jab hum ko muqami kisi bhi qisam ki madad hasil nahi hay, naa he hamare pass Karachi main mojood hamare doston aur family walon se kisi bhi tarha ka rabita (contact) karne ka koi rasta nazr araha hay. aur yehi iss waqt hamari sab se bari kamzoori thi. Hum ko yahan ek din guzar kar buhat achi tarha ahsas ho chuka tha kay Pakistani idare (organizations) jis ko hum sab N.D.M.A (National Diseaster & Management Authority) kehte hain wu khud shayad kisi Disaster ka shikar hu chuki hay. Jab hum Karachi main thy tu calculation udate tu arahi thi magar yeah N.D.M.A naami bala kar kia rahi hay yahan akar pata chala. Mujhe ya mere sathiun ko tu yahan aane ke baad ek bhi karkun N.D.M.A ka nahi milla. Ek aur baat jo sab se alag thi kay hum ko yahan Pakistani naami girami media kahi nazar nahi araha tha. Shayad yahan ki news ya halaat ko dikhana bhi in ki kisi policy ka hissa hogga. Kher, wohi baat kay yeah na dekho kon kia karta hay, yeah dekho kay hum kia kar rahe hain. Hum subh ka intizar kar rahe hain.

Garmi apne arooj par hay, Muqami hospital kay aik taraf bahar hamara imdadi saman (Relief goods) rakhi gai hain, essi kay samne khule asman ke neche hum sab dost aram karne jesa jis ko saholat hoo rahi hay bethe aur lete hain. main yeah sab likh raha hon aur ALLAH se dua kar raha hon kay hum ko Izat kay sath aur hifazat kay sath hamare imdadi kamon ko mukamal karne main hamari maddad kare - Ameen.

Awaraan, Baluchistan: Relief efforts by Friends Of Adnan (Work report -2)

Awaraan, Baluchistan Se:

Hamesha ki tarha iss dafa bhi kuch essa howa jiss ki hum ko koi ummid nahi thi. Guzishta raat jab aram karne ki gharz se hum sare dost (Volunteers) aik taraf ko lete ya bethe thy. garmi se hashar bura tha. Bijli tu door ki baat hay, hath ka pankha tak hamare ko mayasar nahi tha aur hum sab ek dosre ko yehi keh rahe thy ka hath ke pankhe ko apne imdadi saman main sath rakhne ka khaya hum ko kiun kar nahi aya. halki phulki nook jhonk chal rahi thi. aik dosre ko himat dilla rahe thy. kuch dost jali jaldi imdadi kaam ko mukamla kar kay yahan se nikalne ka mashora de rahe thy aur kuch keh rahe thy kay yahan hum jo kuch dekh rahe hain iss ko camere se record karna chahiye aur Karachi jaa kar dunya walon ko dikhana chahiye kay Pakistan he main aik elaqa aisa hay jahan looh janwaron se bhi bad taren halat ka shikar hain.

Adhi raat kay baad jb etne bure halaat main bhi neend hum ko sata rahi thi ussi waqt kuch log ham se milne hamare pass aye, meri ankh lag chuki thi. aik sathi dost ne mujh ko jagaya aur bataya kay kuch gar bar hay ab sambhalo, main herat zada tha kay essa kia ho gaya, mujh ko buss aik he khoof tha aik he baat ki fikar rahi hay kay mere sath aye howe doston aur sathiun ko meri wajha se kisi bhi qisam ki koi mushkil na ho. Main ne dil he dil main Ayat-ul-Kursi ka wird kia ALLAH se himat aur maddad mangi aur jitna khalos se anne walon se mil sakta tha milla. Aane walon ka maqsad sirf ek tha kay hum yeah imdadi saman inn logon kay hawale kar kay yahan se chale jaen, in ki baton se buhat achi tarha andaza hoo raha tha kay yeah loog hum ko bata nahi rahe balke shayad apne baron (waderon) kay bal bote par hum ko hukam day rahe hain. Main nai himat kar kay in ko apni aane kay maqsad say agah kia, aur dill he dill main socha kay Kash k Adnan bhai iss waqt hamare sath hote, kiunke KPK ho ya Balochistan ya Sindh kay remote areas hon ya Kashmir ki wadiyan Adnan bhai ne bari himat aur jurat kay sath iss tarha kay halat ka muqabla kia hay aur apne maqsad se ek qadam bhi peche nahi hate. kafi der tak behas hoti rahi, in logon kay samne hum khud ko be bas aur lachar samjh rahe thy, Akhir ko ek dafa phir main ne koshish kari kay kisi bhi tarha humari mulaqat yahan ke baron (Waedere ya kisi bhi political person) se kara di jae agar wu hum ko yeah baat keh dain tu hum kal subh he wapsi kay liye rawana ho jaen ge. In logon ne apas main muqami zaban main kuch baten kari aur hum ko subh tak intizar karne ka kaha aur yeah bhi hukam de gaiye kay hum inn ki ijazat kay bagher na tu kahi jaa sakte hain naa he kisi bhi qisam ka koi imdadi kaam kar sakte hain. Ghussa tu buhat tha magar waqt aur halat ki nazakat ko dekhte howe inn logon ki baat maan lene main he hamari bhalai thi. hum ne haan kia aur ab kisi ko neend nahi arahi thi, har banda pareshan tha kay dekho subha ko kia hota hay.

Garmi, Habs, Imdadi saman ki dekh rekh, tanhai, koi muqami maddad nahi, na he koi security ka idara mojood na he koi N.G.O mojood. Ek lamhe ko mere dill main khayal aya kay kahi main koi ghalti tu nahi kar chukka hon jiss ki wajha se yahan aya hon aur apne sath apne doston ko bhi le aya hon aur ab essi ghalti ki wajha se hum sab ek bari mushkil main parh chuke hain. Lekin agle he lamhe main ne khud kalami kari "nahi koi ghalti nahi hoi hay hamara maqsad naik hay, aur mere dost / sathi yahan kisi picnic par nahi aye hain balke imdadi kaam karne aye hain, darna kesa darna sirf ek he zaat se hay aur woh hay ALLAH ki zaat.Aur mujh main himat agai, main ne apne sathiun ko hosla diya. subha jo hoga dekha jaye gaa. Issi doran muqami hospital kay doctor hamare pass aye unko sari sorat -e- Haal se agah kia aur bataya kay yahan jungle ka qanoon hay tu yea sab sun kar unhon ne bhi apni be bassi ka izhaar kia.

Aur subha hoi, apne sath laye gaye pani mai se kuch pani ko hum ne istimal kia, zindagi main pehli dafa hum Pani ka istimal buhat ahtiyat se kar rahe thy aur aaj he hum sabhi doston ko Pani ki ahmiyat ka buhat achi tarha ahsas howa, Karachi main hum apne gharon main pani ko jiss qadar zaya karte hain aaj pata laga kay Pani kitni badi nemat hay. apne liye tea banai sath laye bisuits kay sath nashta kia, fiker aur pareshani main kisi se kuch khaya nahi jaa raha tha, raat bhar neend bhi pori nahi ho saki thi, sooraj buhat ziada tapish de raha tha. hum ne apne saman ki taraf ek nazar dekha jitna bhi samet sakte thy sameta aur intizar kia.
9am par kuch log hamari taraf aye jinhon ne hum ko bataya kay inn kay sardar sahab tu shayad kuch ziada masoorf hain aur hum jese logon se milne kay liye in kay pas koi waqt nahi hay haan koi manager type ka banda hum se milna chahta hay. Main ne subha uthne kay baad se abhi tak apni pori koshish kari thi kay kisi bhi tarhan muqami security walon se mulaqat ho sake aur hum unn ko apni pareshani kay bare main agah kar saken magar pori koshish kay bawajood essa mumkin nahi ho saka tha. Forces kay jawan jahan bhi dikhe sirf aur sirf Imdadi kamon main masroof dikhe. Majboran main aur mere sath Karachi se aye howe mere dost aur sathi Bilal bhai ne fesla kia kay hum dono he mulaqat karne jaiye ge aur baqi sathi yahan ruk kar hamara intizar karen, jab tak hum wapas nahi ajate sirf intiizar karna hay aur agar kisi bhi tarha ki koi karowai ya khatra ho tu saman se ziada apni janon ki hifazat karna hay. Saman ki fikr nahi karna. kuch zaroori hidayat de kar main aur Bilal in logon kay sath inn ki 4x4 gari main beth gaiye. aur just 10-12 minute main hum in logon ke dere main mojood thy. Yahan hm ko aik taraf bichi hoi chatai per bethne ka kaha gaya, Zalzale se dere ko bhi buhat nuqsan puhcha tha. Jinn sahib se hum ko mulawat karna thi wu sahab hamare samne aye hum ne bhi pori khusdili ke sath in ko salam kia hal pocha muqami zaban hum ko aati nahi thi essi liye urdu he boli. unhon ne mukamal sabr aur khamoshi ke sath hamari baat sunni. kuch der khamosh rahe aur humara shukriya adda kia. phir hum se pocha hum ab kia chahte hain, main ne inn ko bataya kay hum sirf itna chahte hain kay yeah imdadi saman nihayat zaroorat mand logon tak khud puhanchaen, unhon ne balochi culture ka hawala diya, muqami halaat ka bataya aur hum ko kaha kay yahan jo bhi imdadi karowai hogi yaa ho rahi hay ya tu wu inn logon (wadera & team) ya phir forces wale kar rahe hain. Hum ko ijazat milna mushkil hay. phir bhi jab main ne issraar kia tu hum ko ek din kay liye imdadi kaam karne ki ijazat di gai, 11am ho chuke thy waqt buhat kam tha hum foran apne muqam par wapas aye apne degar sathiun ko bataya kay sirf aaj ka he din hay jitna kaam kar sakte hain karen aur iss kay baad shayad hum ko yahan se jana hoga. Muqami Effected logon ko hamari amad ka ek din pehle he pata lag chuka tha aur woh hamare qarib hee mojood thy kay kab hum taqseem shuro karen. aur kab in logo ko maddad mille. Magar ek baat buhat achi hoo rahi thi kay yeah loog kisi bhi tarha be sabri ka muzahira nahi kar rahe thy. shayad in ko bhi pata tha kay muqami waderon ki ijazat kay bagher hum bhi kuch nahi kar saken ge.

Hum ne adha imdadi saman aik taraf karna shuro kia aur ALLAH ka naam le kar pehle Pani ki taqseem shuro kari, hamara work plan yehi tha kay adha imdadi saman aaj taqseem kar diya jaye aur adha agr moqa mille tu yahan se thoda aage jaa kar kisi remote area main taqseem kia jaye.  Din kay 2 baje tak hum pani ki taqseem se farigh ho chuke thy ab loog rashin, kapron aur degar saman ki taqsem k muntazir thy.

Kuch khas baten:
Pani ki taqseem ke doran kisi bhi qisam ki koi afra tafree nahi thi, sirf mard aur kam umar kay larke he line bana kar apni bari ka intizar kar rahe thy jis ki hidayat sirf ek dafa he di gai aur akhir waqt tak wu buhat sab kay sath apni bari ka intizar karte rahe.
 Iss taqseem ke doran koi bhi khatton hamare pass nahi aye balke hum ne yeah baat khas note kari kay jab se hum yahan aye hain khawateen groups ki shakal main idher udher bethi hain jin ki hifazat ya khayal in kay qabile ya khandan kay loog kar rahe hain.
Hamare pas jitna bhi pani tha iss ka almost adha (half) hum ne taqsee kar diya aur jis ne jitna pani manga hum ne koshish kari kay itna pani he de saken. Mineral water ki bottles main pani pack tha tu hum ko pora yaqen tha kay pani waste nahi hoga. aur esa he howa,

Pani ki tasweem main 4 bottels per person ka avg rakha gaya tha jo taqreban yehi raha, har pani lene wale fard ke hath ki ek ungli par hum water proof marke se chota sa nishan laga rahe thy jiss se kisi aik he fard ko ziada aur dosre ko kaam pani milne ki koi shikayat na ho sake.
Pani ki frahmi taqreban 100 ka lag bhag logon main ho chuki thi. aur ab rashin ki bari thi, yahan logon ko pani se ziada Rashin ka intiazar tha. Karachi se rawana hone se pehle hum logon ne apne apne ghar walon ki maddad se Rashin ka saman kuch iss tarha pack kia tha.

Quantity of food stuff per bag:
5kg Flour (Aata)
2kg Rice (Chawal)
1kg Sugar (Cheeni / Shakar)
95gm pckt of Tea (Tapal)
50gm pckt of Salt (Namak)
50gm pckt of Spices mix (masala)
500gm of Ghee / Oil
6 Candel (moom batian)
5 Match box
2kg Onion (Piyaas)
2kg Potato (Aalo)

Iss tarhan kay hamare pass abhi 70bags mojood thy. Hum dil he dil main ALLAH ka shukr adda kar rahe thy ke abhi tak hum kisi bhi qisam ki mara mari ya loot maar se mehfooz thy aur dua kar rahe thy ke jab tak yea saman hamare pas hay hum sab ko amaan he rahe. Ameen.

ALLAH ka naam le kar hum ne kuch logon main rashin ki taqseem shuro kari, apni amad wale di se aaj tak hum ne jo bhi servey kia tha iss kay doran hum ne kuch logon ko apne hath se parchiyan (note) likh kar diye thy kay wu rashin ki taqseem wale waqt ajaen aur wu parchi hum ko dikha kar rashin le jaen. Yeah humari ek buhat chooti se koshish hay jo hum kar sakte thy aur kar rahe hain.

Al Hamd Ul ALLAH jab hum ne rashin ki taqseem shuro kari uss waqt sirf wohi loog hamare pass thy jin ko parchiyan di gai thi baqi aur log bhi mojood thy jo parchi milne ka intizar kar rahe thay. Aaj ke din hum ne 50 bags ki taqseem kari jin main se 35 bags unn ko mile jin ko parchiyan di gai thi aur bahi 15 bags kuch buzrug hazrat jo hamare qarib mojood thy magar hum se mang nahi rahe thy un se baat kar kay un kay hawale kiye gaiye. Hum ne ALLAH ka shukr adda kia aur sab ne mil kar aik sath namaz -e- asar ada kari. hum sab he dill he dill main ALLAH kay shukr guzar thy ke hamari amad ka maqsad kisi had tak tu pora howa.

Raat hone wali thi aur abhi aur kuch karna mumkin nahi tha kiun kay din bhar ki thakan, bure waqt ka khoof aur pichli raat ki be arami ne ab hum ko kisi aur kaam kay qabil nahi chora tha. Hum sab idher udher beth gaiye main hum jahan mojood tha ussi hospital main gaya, doctor say baat kari aur un ko kaha kay agr mumkin ho tu ek free medical camp lagane main hamari maddad karen. Doctor sahib aur in ki pori team iss baat par buhat khush thi magar unhon ne saaf keh diya kay muqami sarkar ki ijazat kay bagher wu esa kuch nahi kar sakte, abhi iss ki ijazat kab aur kiss se lena hay yea meri samjh main nahi araha tha. phir bhi himat tu thi aur fesla bhi tha kay jate jate ek free medical camp bhi lagana hay.
Aaj ke din yahan Awaraan, Balochistan main shadeed garmi rahi. haal se behaal ho gaye, lekin sab se ziada khushi iss baat se hoi kay humara imdadi saman hamari marzi aur hisab se jin logon ko milna tha de diya gaya tha. Baqi saman bhi Insha ALLAH kal mustahiq logon ko dena tha. Armed forces ki amaad buhat tex rahi, Forces kay jawan sara din nazar aaty rahe aur kisi bhi qisam ke khoof se laparwah, sirf aur sirf imdadi saman le kar in ki gariyan idher udher aati jaati nazr aati rahi, din main ek dafa Helicopter bhi nazr aya jo shayad kisi remote area main imdadi saman ki tarseel ke liye gaya hoga.

Aaj bhi hum ko yahan Awaraan, Balochistan main kisi bhi N.G.O ki koi shakal nazar nahi aye buss muqami loog he groups bana kar ek dosre ki maddad karte dikh rahe hain, Koi media wala bhi nahi dikha. Socha tha kay shayad koi media wala mil jaye tu hum ussi kay zariye apne ghar walon ko yahan kay halat aur apni kheriyat se agah kar saken. Lekin abhi tak esa kuch bhi nahi ho saka.

Ek buhat khas baat, hum se hamare mobile phones, aur 2 camera guzishta subha he le liye gaiye thy jab hum dere par gaiye thy aur hum ko yaqen dialaya gaya tha kay hamari wapsi par hamara zaati saman hum ko shukriya kay sath wapas kar diya jaiye gaa. mobile phone sath rakhne ki sirf ek he wajha thi kay shayad koi network kaam kar jaiye aur hum apne gher walon se rabita kar saken aur camera iss liye kay jo kaam hum adhora choor kar ajaen wu kaam kuch aur loog aur N.G.O pora kar saken aur hum kuch tasaweer aur vids bana saken. Ye bhi abhi tak nahi ho saka. Phir bhi hamari yahan amaad ka jo maqsad tha wu kisi had tak pora ho chuka tha, ab hamare imdadi saman main 25 bag rashin kay aur adha pani aur mediciens baqi hain jo Insha ALLAH 1-2 din main mustahqin tak puhanca di jaen ge. Raat hum ne apne liye potatos (aalo) aur chawal bane aur hum sab ne ALLAH ka shukr ada kar ke pait bhar kar khaye, abhi muqami loog bhi hum se thoda baat kar rahe hain. Shayad abhi hum in kay liye anjan nahi rahe hain. Thodi der pehle hospital main he koi baat kar raha tha kay forces kay jo jawan relief work main hissa le rahe hain unn par kuch dhehshat gardon ne hamla kia hay jiss main kuch jawan zakhmi bhi howe hain. yeah aik buri aur afsoos wali khabar hay. shayad essi liye yahan koi N.G.O nazar nahi arahi hay.
ALLAH se dua hay kay hum sab ko apne maqsad main kamyab kare aur yahan ke logon ke liye asani kay raste nikale. Ameen.


main aur mere kuch sathiun ne raat main nikal kar qarib ke elaqon main jane ka fesla kia aur yeahi socha kay dekhte hain kay yahan se kitna aagy tak hum jaa sakte hain. Imdadi saman ka bojh kuch kaam ho chuka tha tu jitne dost imdadi saman kay pass thy hifazat kay liye kafi thy aur pata nahi kiun abhi kisi bhi qisam ka koi khoof dill main nahi raha tha.

Main aur ek dost hospital kay area se agay nikle tu kuch jawan hamare qarib aye aur hum ko apne masail bataye aur apni majboori se hum ko agah kia kay woh loog chah kar bhi inn areas se bahar nahi jaa paa rahe hain, in logon ne hum se yehi request bar bar kari kay agr mumkin ho tu hum in jawanon ko aur in kay ghar walon ko yahan se kahi aur muntaqil karden, Yeah kaam kisi bhi tarha hamare ikhtiyar main nahi tha nihayat hamdardi kay sath main ne in ko bataya kay hum koi N.G.O nahi hain balke ek choota sa social group hain jo sirf kuch dinon kay liye yeah imdadi saman le kar yahan aye hain phir bhi hum Karachi jaa kar pori koshish karen ge kay yahan kay halat se dunya ko agah karen shayad koi kuch kar sake. In jawanon ke chehron par mayusi saaf thi phir bhi hum ne pori koshish kari kay jitni hosla afzai aur himat hum in ko de sakte hain apni baton se inn ko den.
inhi main se kuch jawanon ne hum ko mashora dia kay Awaraan city se thoda agae taqreban 5-8km door ek jaga hay jahan sb kuch khatam ho gaya hay zinda bach jane wale abhi bhi waha mojood hain aur maddad ka intizar kar rahe hain. kiunke raat ziada ho chuki thi tu iss waqt whaan jana mumkin nahi tha hum ne subh waha jane ka fesla kia aur kuch jawanon se bhi maddad mangi kay agr mumkin ho tu hamarai bacha howa imdadi saman wahan tak puhchane main hamari maddad karen. kuch he jawan hamri maddad karne par razamand hwe. Hum log wapas apne base camp, Local hospital of Awaraan, Baluchistan wapas agay, kuch idher udher ki baten kari aur jis ko jahan moqa mila wahi lamba ho kar let gaya.